Der Toggenburger Landts-Huldigungs-Eydt

[Wir] schwören meinem gnädigen Herren/ Herren N.N. Abbte deß Gottshauß St. Gallen als eüwerem natürlichen Herren von desselben Gottshauß wegen/ Threüw und Wahrheit zue leisten/ Seiner Gnaden und deß Gottshauß Nutzen zue förderen / und Schaden zue wahrnen und zue wenden/ auch Seiner Gnaden/ Dero Vögten/ und Ambtlüthen von deß Gottshauß wegen gehorsamb zue seyn/ ein Aigenmann als ein Aigenmann/ ein Vogtmann als ein Vogtmann/ und ein Hindersäß als ein Hindersäß/ und nach deß genandten meines gnädigen Herren Abgang einem Capitul und Convent des Gottshauß St. Gallen gehorsamb und gewärtig zue seyn untz an einen regierenden Abbt treüwlich und ungefahrlich.

Diser Eydt wird nicht nur so offt ein neüwer Herr an die Regierung kombt/ oder mit Abbt Vlrichs Landtrecht/ sonder von Zeit zue Zeiten einem jeweiligen Landtvogten im Toggenburg zue Handen deß Gottshauß St. Gallen geschworen/ wie er ist ohn einig sehrneres Fürwort/ Anhang/ Außnahm/ oder Bedingnuß/ namblich dem gefürsteten Herren Abbten/ als ihrem natürlichen Herren/ wie es die Graffen/ und Herren von Toggenburg/ nach dem Exempel an derer Graffen zue Kyburg/ Habspurg/ Nellenburg/ und dergleichen gewesen/ welcher Graffschafften nachkommende Jnhaber heüt zue Tag Ober- und Landtherren benambset werden/ und Sie es hiebevor allzeit in der That selbst gewesen seynd.